Бишкек, 2025-жылдын 5-февралы – Бишкек шаарында медициналык-биологиялык маалыматты статистикалык талдоонун негиздерине арналган эки күндүк семинар болуп өттү. Семинардын катышуучулары, медицина тармагынын адистери, илимий изилдөөлөрдү жана саламаттыкты сактоо жаатындагы маалыматтарды талдоону жүргүзүү үчүн, ошондой эле Акушердик мониторинг жана жооп берүү тутумунда (АМжБТ) иштөө көндүмдөрүн өркүндөтүү үчүн зарыл болгон статистикалык маалыматты талдоо жаатындагы билимин жогорулатышты.
АМжБТ платформасы пилоттук төрөт үйлөрүнөн оор төрөттөн кийинки кан кетүү жана эклампсия учурлары боюнча онлайн маалыматты чогултууну жеңилдетүү үчүн иштелип чыккан. Платформанын негизги максаты - маалыматты чогултууну борборлоштуруу жана оптималдаштыруу, бул энелердин ден соолугунун критикалык абалын көзөмөлдөөнү жана аларга жооп кайтарууну жакшыртууга мүмкүндүк берет.
Семинардын тренери катары физика-математика илимдеринин кандидаты, Кыргыз-Россия Славян университетинин физика, медициналык информатика жана биология кафедрасынын доценти Елена Кондратьева илимий изилдөөлөрдү туура жүргүзүү жана саламаттыкты сактоо жаатындагы жыйынтыктарды жакшыртуу үчүн статистиканын маанилүүлүгүн белгиледи: "Статистика натыйжалуу изилдөөлөрдү иштеп чыгуу, маалыматты туура талдоо жана ишенимдүү тыянактарды алуу үчүн керек. Медицинада бул бейтаптарга кызмат көрсөтүүнүн жана коомдук саламаттыкты сактоонун сапатын жакшыртууга алып келет".
АМжБТ сыяктуу платформалар аркылуу алынган ишенимдүү статистикалык маалыматтардын болушу акылга сыярлык чечимдерди кабыл алуу үчүн абдан маанилүү, алар энелердин өлүмүн алдын алууга, үй-бүлөнү пландаштыруу жаатындагы аялдардын муктаждыктарын канааттандырууга жана репродуктивдүү саламаттыкты сактоо жаатындагы сапаттуу кызматтарга жеткиликтүүлүктү кеңейтүүгө багытталган.
Тренингдин катышуучуларынын бири, КММАнын акушерлик жана гинекология кафедрасынын окутуучусу Гүлнур Жолдошбекова семинардын анын кесиптик иши үчүн практикалык пайдасын белгилеп, окутуудан алган таасирлери менен бөлүштү: "Он жыл мурун мен SPSS (Statistical Package for the Social Sciences - коомдук илимдер үчүн статистикалык пакет) программасын - маалыматты статистикалык иштетүү үчүн окуган элем, бирок убакыттын өтүшү менен аларды кантип киргизүүнү, кантип эсептөөнү унутуп калдым. Азыркы учурда программа мага долбоор жана АМжБТ менен иштөө үчүн андан ары өсүүм үчүн инструмент катары керек. Жаңы билимди макалаларды жазуу жана эл аралык илимий платформаларга чыгуу үчүн да колдоном”.
Семинар БУУнун Түштүк-Түштүк кызматташтыгынын алкагында энелердин ден соолугун чыңдоо көрсөткүчтөрүн жакшыртуу максатында сапатты камсыз кылуу боюнча долбоорунун алкагында өткөрүлдү. Индия-БУУ Өнүктүрүү боюнча өнөктөштүк фонду тарабынан каржыланган бул долбоор Кыргызстандагы алдын алууга мүмкүн болгон энелердин ооруларын Акушердик мониторинг жана жооп берүү тутуму (АМжБТ) жана телеконсультациялар аркылуу Кыргызстандын беш пилоттук төрөт үйүндө сапаттуу медициналык жардамга жеткиликтүүлүктү кеңейтүү аркылуу азайтууга багытталган.
Долбоор Кыргыз Республикасынын Саламаттык сактоо министрлиги жана ЮНФПА тарабынан колдоого алынып, ишке ашырылууда.
